الرئيسيةاخبار الاصلد. نزيه قسيس الـتّـــجْــنــيــد!
اخبار الاصل

د. نزيه قسيس الـتّـــجْــنــيــد!

بَـعْــــدِ الـنَّـكْـبــِه والـتِّـشْــريـــــد
وتِـمْـيـيـز وخـــنــق وتـشــديـــد
حـاكِــمْـنـا بَـــــدّو نــمْــشـــــي
بْـــدَرْبِ الـخِـدْمـِـه والـتِّـجْـنـيــد!
*
وحـاكِـمـنـا طَـبْــعـــو الـتَّهْــديـد!
وكُــرمـالــوْ ظُـلـمــو بــيــزيـــد!
والـيــوم، بــراســــــو طـالـِـــع  
غُــنـــاي ومَـــــوّال جْــديــــد!
*
والـيــــــوم ـ فَـطْــنـــــان فـيـنـــا
ومَــوْجــوع قَـلـبــو عَـلـيـنـا (؟)
بَــدَو نِـتْـجَــنَّــد  فــي جـيــشــــو
حَـتّـى جـيـشـــو يِـحْـمـيـنــا (؟!)
*
وبَـــدو يِــسْـــأل خـاطِــرْنـا (؟!)
وصَــرْلـو سْــنــيــن نـاطِــرْنـــــا
وبـَــدّو فــي أمْـنـو وهـمّــو  (؟)
نْــشـــاطْـرو  وِيْـــشـاطِــرْنــا(؟)
*
وبَــدّو – فـي حُـسْـن الـنِّـيـِّـه(؟)
وروح الـدّيـمُـقـــــراطـــــيِّــه(؟)
ما نِخْسَـر مِـن خـيـرو خـيـر (؟)
ونِــتْـــنَــعَّــم بــالـحُــرِّيـِّـــــه (!)
*
وبـدّو، حاكِـمْـنا الـمِـفْـضـال(؟)!
يـِـدْهــيــنــا  فــي هَــالــمَـــــوّال
ونـرْمــي حــالْــنــا فــي الــنّـار!
وتِـزْبـِـلْـــــنــا كُـــل الأجْــــيــال!
*
بَـــدّو – وإِحْـنـا مِــش عُــمْـيــان
وْلا طُــرْشـــان وْلا هُـــــبــلان !
بَــدّو يْـحـاصـــرْنــا تَ نْــقـــــوم
نْـهـاجِــر أو نِـبْـقـــى خُــرفــان!
*
وبـَــدّو يْــقَـسِّــمْـنــا قِــسْـمــيــن
بْــمـيــــزانِ الـعـيـلِـــه والــدّيــن
حَـتّــــى يـِـسْــتَــفْـــرِد فـــيــــنــا
ويِـبْـلَـعْــنــا مِـثـْــل الـتَّـنّـــيــــن!
*
وحـَـتـّى يْــمَــزِّعْــنــا تـِـمْـــزيـع
وحَـتّــــى يْــقَـطِّـعْـنـا تِـقْـطــيـــع
بَـدّو يِـــخْـلَـق فِــتْــنِــه جْــديـدي
حَـتّـى حَــــقِّ الـنّـاس يْـضــيـع !
*
وبـــدّو بْــمَــــوّال الـتِّـجْـــنـيــــد
بـالـتِّـرغـيـــب وبــالـتـِّهْــديــــــد
نْــصـــيــــــر لَـوْلادو خُـــــــــدّام
أو نِــرْضَــخ ونْـبـــوس الإيــــد!    
*
بَــــدّو، وْصَـرْلـو سِـــتِّ عْــقـود
وِفْــنــونـــو مــــا إِلْـهــا حْـــدود
والـيــــوم جـايـيـنــــا بْـــفَـــــنْ:
بَـــدّو عِـــنْـدو نْـصـيــر جْـنــود!
*
بـــدو – ومــا بـَــدّي يـــا نـــاس
يِــــزرع فـي الـنـاس وســـواس
بَـدّو يـِـنْـزعْـنــي عَــــن أصْـــلي
ويِـنْـزَع مـن روحي الإحْسـاس!
*
والـيـــوم، لُــعْــبِـــــه جْـديــــدي
بَــــــدّو أمْــضــي فـــي إيـــــدي
وبَــــــدّو أنْــســـى وأَســــــــاوِم
عَ تْــطْــويـعــــي وتِـجْـنــيـــدي!
*
وبَــــدّو أنْــســـــــى لُــعْــبــاتـــو
وأنْــســــى كُـــــــل عَــمْــلاتــــو
وبَـدّو أنْـسى – ونـاسِـــــي إنّــو
صُــــرْنــا نِــعْــرِف  خِـدعـاتــو!
*
وبَـــــــدّو يْــنَـسّـيــــنـــي ديـنِـي
وشَـعْـبـي اِللّـي طـيـنـو طـيـنِـي!
وبَــدّو يِــسْـلَخـْـنـي ويِـبْـلَـعْــنـي
ومِـثْـل الـعَــظْـمِـه يـِـرْمـيـنـــي !
*
وبَـــدّو يـْـفَـرِّقـْـنــــا تَ يـْــســود
وأبْـقــــــى لَ أَمْـــرو مَــقْــيـــود
وبَـــــــدّو يْـوَهِّـــمْــــنــــا إِنّـــــو
بْـنِـربـَــح لَـو صُـرنالـو جْــنـود!
*
وبَـدّو تـْصــيــبــنــا ِمْـصـــيـبـِــه
ومــا تِــبْــقـــى  إلْــنــا هـيـــبِـــه
ونـاســي – وبَــــدّو يْـنَــسّـيــنــا
كْـنـيـسِـه صـــــــارَت  زْريـبِـه!
*
ونـاسـي شـــو عَـــذَّب هـالـنّاسْ
وسَــــقــاهــا مَــــرار الـكـــــاسْ
ولا فــــي إقـْــرث أو بِــــرعِـــــم
وَفَّـــــــر كْـنـايِـــس وجْــــراسْ!
*
وْمـــن مَــعْــلــول للـبَــصَّــــــــه
مــا ظّــــل غــــيـــر الـغَــصَّـــــه
والــبِـــرْوِه وكْـنـيـسِـتـْــهـــــــــا
قُــصِّــتْــهــا نَـفْـــس الـقُــصَّــه!
*
وْلا سُـــحْــمـــاتــا والـــدّامـــون
أو حَـــتّـــى ديـــرِ الـلَّـطــــــرون
وْلا مَــهْــــد الـفـــادِي الـهـــادِي
نـاجـي مِـن  فِـكْــرو الـمَـأفــون!
*
وْمَــهْــد فـــــاديـــنــا يَـســــوع
وِقـْـيـامِـه مِـضـْـويـِّـه شْـمـوع !
وألْــف بـــابــا مــع مُــطـــران
مــا إلهُــن صــوتْ مَـسْــمــوع!
*
وألْــــف سِـمْـســــار وسِـمْـسـار
بَـــــــدّو الـنَّـصـــارى تُـجّـــــــار
تْـبـيــــعِ الــدَّم ، وْمــا تِــهْــتَــــم
وتِــرْمــي ولادْهـــــا فِ الـنّــار!
*
تْـبــيــــعِ الــدَّم ، والإِحْـســــاس
وتِـنْسى الحَــقّ وْحَــــقِّ الـنّـاس
وتِـنْـسـى تِـرحـيـــل وتِـهْـجـيـــر
وتِـنْـسـى الـمَهْــد ومارِ الـياس!
*

وتِـنْـسـى تِـهْـجـيـر وتِـهْـجـيـــج
وتـِـقـْـبـل تـِهْـمـيـش وتـِهْـريـج!
وبَـــدّو نِــرْضـــــى بـِــالــقِـلِّــــه
وِنْـعــيـش عـيـشِــة تـِـسْـكـيــج!
*
وبَــدّو يْـنَـسّـيـنـــا شـــــو صــار
فـي المـاضـي فِ حْـجــارِ الــدّار
ونـاســي سَـلْـب ونَـهْـب الأرض
وسْــيـاجــو دايـِـــــر مِــنْــــدار!
*
ونــاســي – إنّــو مْـعـاديــنـــــي
ومــا بِــتْــعَــرَّف عَ ديــــــنــــي!
وبَـــــدّو – عَـالـمَـهْـجَـر أرْحَـــل
وعَـالــمَــــنـافــي يْــــوَدّيــنـــي!
*
وبَـــــدّو يْـســــاوِم  ضَـمـيـــري
وأنـــْســـــى الأرْض الأَســيــري
وبَــدّو يـِقْـطِّـعْــنـي عَــن أهْــلـي
وأنْـســى حَــقّي  وْمَـــصـيــري!
*
وبـَـــــدّو أقْــبَــــــل قــانــونـــــو
وأَحــابـيــــلــــــو وفْــنـــــــونــو
وبَـــدّو يـِدْهـيـنـــي يــــا نــــاس
ويْـقـولوا عَــنّـي: “زْبــونــو!”
*
وبَـــدّو يـِـدْهــيــنــــــي بْـــــكَلام
مَــعْــســــــول وكـُـلّـو أوْهــــــام
وبَــدّو يْــغَــيِّــــرْ وِجْــــدانــــــي
وثــيــابــــي بْــثــوبِ الـخُــــدّام!
*
وبَــدّو يِـعْــمَـلْـنـــــي جُــــنْـــدي
ويِــبْـقـــى فـوقِــــي أفَــنْـــــدي!
بَــدّو – وأنــا مـــــــا بَــــــــــدّي
وهــذا مـا بـيـمْـشــــي عـِـنْـدي!
*
وبَـــدّو  يْــحَـمِّـلـنـــي سْــلاحـــو
حَـتـّــــى وْلادو يِــرْتـــــــاحـــــو
وبَـــدّو يـْحَـمِّــلْــنـــــي ذْنــوبـــو
وعَ حْـسـابــي يـْـزيـــدِ رْبـاحـو!
*
وبَـــدّو يْــضَــحّــي بِــوْجــــودي
ويْــحَــمِّــلْــنــي بــــــــــــارودي
وبَـــدّو يْـنَـسّــيــنــي شَـعْـــــبــي
وأرْض جْـــدودي الـمَـهْــدودي!
*
وبَــدّو يـِــمْـحِــــي إيــمــانــــــي
بْـعــيـشِـــه حُـــــرَّه بْــأوْطـــانـي
وأنـــــا  مــــا بَـــدّي يـــا نـــاس
غــيــــر حَــقّــــــي الإنْـســـانــي
*
وأنـا مَـــع سِـــــرْب الـحَـمــــــام
وجُــنْـدي فـي جـيـــشِ الـسَّــلام
وأنــا مــــــا بَـنْــصُــــر ظــالـِـــم
مــاشــــي عَ دْروب الــظـَّــــلام!
*
وأنــــا مِــــن أرْضِ الـجَــلــيـــل
وتـِلـمـيــذ عــيــســـى الـنَّـبــيــل
وأنـا مــــا بَـنْـصُــــر مِـحْـــتَــــل
مَـهْـــد وجـامِــع فـي الـخَـلـيــل!
*
وأنــا بْــفِـكْـــــري الـغَـــسّـانـــي
وأصْـلـي وفَــصْـلــي الكِـنْعــانـي
قَـلـبـي مَـع شَــعْــبـي المَـنكــوب
ومــا عِـنْــدي وَطَــــــن ثـانـــي!
*
وقَـلْـبـي مْـعَـلَّـــق عَـالـصَّـلـيـــب
كُـرْمـــالِ الـبـيـــــتِ الـسَّــلـيـــب
وإحْـنـا  أهْـــــــــــــلِ  الـمَـحَـبـِّـه
بْــسـاحِــة وَطَــنّـــا الحَــبــيــب!
*
وإحـنـا مَـــعْ نـــــورِ الــصَّـبــاح
وحَـــيّ! حَـــيّ! عَـلـى الـفَــلاح!
وإحْـنـا – وَصّـانـــا الـمَـســـيــح
مـا نـحْـمِـل فـي الإيـــدِ  سْــلاح!
*
وإحْـنـا – الـبـيــتِ  الـنَّـصْــرانـي
فـي الإيــمــــــان الـرَّبّــانــــــــي
بَــدّنـــا عَـــــالأرض الـسَّــــــلام
ونـــور الـــحُـــبِّ الإنْـســانـــي!

اترك تعليقاً

لن يتم نشر عنوان بريدك الإلكتروني.